Larong KALYE, Salitang KALYE

Posted: June 13, 2010 in Uncategorized
Tags: , , ,

Sa tuwing nakakakita ako ng mga batang naglalaro ngayon sa kalye, hindi ko maiwasang maalala ang aking pagkabata. Iba na kasi ang mga bata ngayon. Kung dati eh holen at teks ang hawak kagad paggising sa umaga, ngayon ay pagcocomputer na kagad ang inaatupag. High tech na kasi. Maiisip mo na mapalad sila dahil nasa bagong henerasyon na sila. Pero para sa akin, mas mapalad ako sa kanila dahil naranasan ko ang mga larong kalye noon na tila na nawawala na ngayon.

Naalala ko pa noon na dumadayo pa kami sa kabilang ilog para lamang makipaglaban sa teks at holen. Pagtapos ng klase naman eh kumakaripas kami ng takbo sa isang tindahan upang maglaro ng pabunot o di kaya ay makipaglaban ng gagamba. Lahat na siguro ng larong kalye ay nasubukan ko noon. Pati na rin ang chinese garter at jackstone.

Simple lang naman ang mga laro noon. Hindi kailangan ng malaking pera para lamang maging masaya. Sapat na ang limang piso pambili ng holen na malalaro mo na sa buong araw. Sapat na ang mga gamit na tansan at mga goma para makalaro.

Sa mahigit labin limang oras na nilalagi ko sa kalye para maglaro at pagbabad ko sa initan, hindi maiiwasan na may mga kakaibang mga salita kang mapupulot. Ang ilan sa mga ito ay aking tinala at binigyan ng kahulugan.

TOBOLACHI/TOBALACHI – salitang ginagamit kapag may kaibigan kang nawawalan ng gamit. Deklarasyon ito na kapag nahanap mo ito ay magiging sa’yo na. pero kadalasan ay pabiro lang naman ito.

DAMBOL/JAMBOL – salitang ginagamit sa larong holen. Imbes na paglabanan ng maayos ang mga nakatayang holen sa bilog, pag-aagawan na lang nila ito. Sinaunang power tripping.

BALETENGGA – salitang ginagamit kapag gusto nyong pabagsakin ang lumilipad na saranggola sa pamamagitan ng bato na nakatali sa nylon.

EKTAD – tumutukoy sa isang saranggolang napigtalan ng tali. Kung sino ang makakuha nito ay magiging sa kanya na ang saranggola.

OBLIK/OBLIQUE – salitang ginagamit sa larong teks. Tumutukoy ito sa teks na salungat ang ayos sa iba pang teks. Isang uri ng kadayaan na hindi dapat tularan dahil posible kang mapaaway.

KATIKBE – isang uri ng hugis posporong halaman na pinambabala sa laruang baril. Kadalasang pamalit ito sa aratelis bilang pambala. Mas masakit ito kapag tumama sa balat.

UKATI – tawag sa isang uri ng halaman na may dahong matutulis. Bakit UKATI? Dahil kapag tinusok mo ito sa iyong balat, isa lang ang masasambit mo. Oooh Kati.

TAYMPERS – salitang kahintulad ng TIMEOUT. Ginagamit ito kung gusto mong itigil na muna ang laro.

PETER – tawag sa isang batang mahusay sa isang laro kagaya ng holen. Ang batang ito ay kadalasang hindi na sinasali dahil sa taglay na kahusayan nito.

PATI PATO – tawag sa isang sitwasyon na kailangan mo nang itaya ang lahat para lamang manalo.  Ito ay kadalasang ginagamit sa larong teks.

TUTULSIT/TUTUMPIT/TUTURIT – salitang ginagamit kapag may isa kang bagay kagaya ng pamato na napunta sa malayo. Kadalasang maririnig sa mga larong sipa at holen.

BAGOLDS – tawag sa holen na walang guhit o kulay sa loob. Ito ay ang mga holen na iisa lang ang kulay kagaya ng blue, green, o transparent. Ang halaga nito ay katumbas ng dalawang holen na may guhit sa loob.

MOTHER/FATHER/BABY – tawag sa mga manlalaro ng chinese garter at 10-20. Sa pagkakaalam ko, ang MOTHER/FATHER ang lider ng magkabilang grupo at ang BABY naman kadalasan ay ang pinakamaliit o pinakabata.

TANCHING – isang sugal na kadalasang nilalaro ng mga bata. Ito ay parang larong holen na imbes na holen ang nakataya, barya ang nilalagay nila sa bilog o parisukat.  Hindi ito rekomendado sa mga bata.

CHA – salitang ginagamit ng mga bata sa pagbibilang. Ang katumbas nito kadalasan ay isa (1) o di kaya ay odd numbers kagaya ng 1, 3, 5, 7 o 9. Kadalasang ginagamit na pambilang sa mga teks na malaki ang bilang.

Ilan lamang ito sa mga salitang ginagamit sa mga laro noon. Dadagdagan ko na lang ito kapag naalala ko pa yung iba. Maaari kayong magbigay ng kumento kapag may mga maling kahulugan ang nabigay ko sa mga salitang ito o di kaya’y magbigay pa kayo ng iba pang salita na maaaring idagdag sa aking listahan.

Ang mga larong kalye ay unti-unti nang nakakalimutan dahil sa mga makabagong teknolohiya. Wag sana natin itong hayaang mawala dahil bukod sa ito’y nakakalibang, nagsisilbi rin itong buhay na kasaysayan ng mga batang Pilipino.

Advertisements
Comments
  1. learning says:

    This might be the greatest read on here

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s